Ny 03 Jona 2019 no nisy Fianianana voalohany nataon’ireo Mpitsirika masomboly ka tao amin’ny Fitsarana Ambaratonga voalohany Anosy Antananarivo no nanaovana izany. 105 no isan’ireo Mpitsirika masomboly vita fianianana ireo ary izy ireo dia miparitaka any amin’ny Faritra 22 eto Madagasikara. 4 ka hatramin’ny 6 eo ho eo ny isan’ny Mpitsirika masomboly isaky ny Faritra.
Ny « dingan’ny Fankatoavana karazam-boly » izay vao napetraky ny SOC vao haingana dia efa manomboka mipetraka tsara amin’izao eo anivon’ireo mpisehatra rehetra. Maromaro noho izany amin’izao fotoana izao ireo fiaraha-miasa amin’ny Tetik’asa isan-karazany mahakasika Fankatoavana karazam-boly.
Tamin’ny taona 2019 dia 1 001,08 taonina ny vokatra masombolim-bary voamarina ka ny 869,48 taonina dia vary an-drano ary ny 131,6 taonina dia vary an-tanety.
Na dia teo aza ny fisian’ireo loza voajanahary sy olana maro samihafa nitranga nandritra ny taona 2020 (tondra-drano tamin’ny fiantombohan’ny taona, avy eo ny valan’aretina COVID-19), dia niakatra be ny vokatra masomboly voamarina. Raha 1 398,47 taonina no vokatra tamin’ny 2019 dia tafakatra 2 544,94 taonina izany tamin’ny 2020, izany hoe niakatra 82%.
